ABŞ Prezidenti Donald Tramp administrasiyasının əsas üzvləri Amerika liderinin Kemp-Devid iqamətgahında gizli müşavirə keçirərək İrana qarşı gələcək addımları müzakirə ediblər.
“Axios” portalının üç amerikalı məmura istinadən yaydığı məlumata görə, analoji görüş sonuncu dəfə 2025-ci ilin iyununda – İsrailin İrana hücumundan cəmi bir neçə gün əvvəl baş tutmuşdu.
Kemp-Devid görüşünün iştirakçıları
Məlumata əsasən, müşavirəyə vitse-prezident Cey Di Vens sədrlik edib. Toplantıda dövlət katibi Marko Rubio, müdafiə naziri Pit Heqset, prezidentin xüsusi elçisi Stiv Uitkoff, Mərkəzi Kəşfiyyat İdarəsinin (MKİ) direktoru Con Retkliff və Birləşmiş Qərargah Rəisləri Komitəsinin sədri general Den Keyn iştirak ediblər.
Yaxın Şərqdə mümkün hərbi addımlar
Daha əvvəl Donald Tramp “Time” jurnalına müsahibəsində ABŞ-dəki aralıq seçkilərindən sonra İrana qarşı bombardmanların bərpa olunması ehtimalını istisna etməyib.
Nəşr həmçinin bildirir ki, Ağ Ev rəhbərinə Səudiyyə Ərəbistanının Yəməndə husilərə qarşı planlaşdırdığı əməliyyata qoşulmaq çağırışları edilib. Səudiyyə tərəfi Trampın üsyançılara qarşı aviazərbələrə icazə verməsində israr etsə də, ABŞ prezidenti hələlik bu addımdan imtina etməyə meylli görünür.
