ABŞ 9-cu Dairə Apellyasiya Məhkəməsinin üç hakimdən ibarət kollegiyası federal hökumətin təcili müraciətini təmin edərək Dövlət Departamentindən 2027-ci maliyy ili üçün Müxtəliflik Viza Proqramına qeydiyyatı noyabrın 1-dək açmağı tələb edən qərarı dayandırıb.
Dairə hakimləri M. Marqaret MakKeoun, N. Rendi Smit və Holli A. Tomas oktyabrın 29-da müəyyən ediblər ki, iddiaçı Red Eagle hüquq şirkəti qanunun qoruduğu maraq dairəsinə daxil deyil və iddia qaldırmaq hüququna malik deyil. Buna görə də hökumətin apellyasiya şikayətinin təmin olunması ehtimalı yüksəkdir. Hakimlər bildiriblər ki, viza proqramı hüquq şirkətlərinə gəlir qazandırmaq üçün deyil, immiqrasiyanı təşviq etmək üçün yaradılıb. Hakim Smit qərarla razılaşdığı ayrıca rəydə şirkətin Konstitusiyaya əsasən də iddia qaldırmaq hüququnun olmadığı qənaətinə gəlib.
Təcili dayandırma qərarı hökumətin apellyasiya şikayətinə baxılan müddətdə qeydiyyatın bağlı qalmasını təmin edir. Qərar işin mahiyyətini həll etmir. Bundan əvvəl San-Dieqoda ABŞ dairə hakimi Cinsuk Ohta DV-2027 “Green Card” lotereyasına qeydiyyatın noyabrın 1-dək açılmasına qərar vermişdi. Dövlət Departamenti təhlükəsizlik yoxlamalarının nəzərdən keçirilməsi üçün qeydiyyatı dayandırmışdı.
Red Eagle hüquq şirkətinin sahibi Körtis Morison iddia qaldırmaq hüququ ilə bağlı nöqsanların qarşısını almaq üçün tələblərə cavab verən viza sahibinin iddiaçı qismində iştirakı ilə məhkəmə prosesini davam etdirməyi planlaşdırdığını bildirib. 1990-cı il İmmiqrasiya Aktı ilə yaradılmış proqram tarixən immiqrasiya səviyyəsi aşağı olan ölkələrdən olan şəxslərə hər il 55 minədək daimi yaşayış vizası verir.
