Pentaqon Yaxın Şərqdə hərbi gücünü artırmaq məqsədilə bölgəyə üçüncü aviadaşıyıcı zərbə qrupu və əlavə dəniz piyadaları qüvvələri göndərməyi planlaşdırır. Bu addım ABŞ hərbi kontingentinin regionda daha 9-10 min nəfər artırılması anlamına gəlir.
Miraz.TV xəbər verir ki, bu barədə “The Wall Street Journal” qəzeti ABŞ rəsmilərinə istinadla məlumat yayıb.
Qüvvələrin yerləşdirilməsi və hərbi hazırlıq
Məlumata görə, hərbi gəmilərin, qırıcı təyyarələrin, dəniz piyadalarının və dənizçilərin noyabr ayının sonunadək bölgəyə çatacağı gözlənilir. Regionda davam edən gərginlik fonunda mövcud nisbi sakitliyin hər an pozula biləcəyi və bu qüvvələrin yeni müharibə ehtimallarına qarşı yerləşdirildiyi vurğulanır.
Üç aviadaşıyıcı qrupunun fəaliyyəti
“Theodore Roosevelt” aviadaşıyıcısı sentyabrın 27-də San-Dieqodan yola düşüb. Hazırda “George H.W. Bush” və “George Washington” aviadaşıyıcıları da Yaxın Şərqdə yerləşdirilib.
Qəzetin qeyd etdiyinə görə, “George Washington” aviadaşıyıcısı bölgədə qalarsa, ABŞ aprel ayından bəri ilk dəfə Yaxın Şərqdə eyni vaxtda üç aviadaşıyıcı zərbə qrupuna malik olacaq.
