ABŞ-ın Texas ştatında güclü daşqın onlarla insanın həyatına son qoyub. Kerr dairəsində baş verən təbii fəlakət nəticəsində azı 43 nəfər ölüb. Onların 15-i uşaqlardır.
Hazırda 27 qız itkin düşmüş sayılır. Onlar Camp Mystic yay düşərgəsində istirahət edirdilər.Axtarış-xilasetmə işləri dayanmadan davam etdirilir.
İndiyədək 850 nəfər təxliyə olunub, 8 nəfər isə müxtəlif dərəcəli xəsarətlər alıb. Bəzi yollar yararsız vəziyyətə düşüb, telefon rabitəsi kəsilib.
Texasın bir neçə dairəsində fövqəladə vəziyyət elan olunub. Milli Hidrometeorologiya Xidməti növbəti güclü yağışlara görə əhalini dərhal yüksək ərazilərə çəkilməyə çağırıb.
Prezident Donald Tramp vəziyyətə münasibət bildirib.
O, Texasda baş verənləri “şokedici” və “dəhşətli” adlandırıb. Ağ Ev isə ştata əlavə yardım göstəriləcəyini vəd edib. Trampın göstərişi ilə Daxili Təhlükəsizlik Naziri Kristi Noem Texas ştatına ezam olunub.
Texas ştatının qubernatoru Qreq Ebbott imzaladığı sərəncamla xilasedicilərə bütün zəruri resurslara çıxış imkanı verib və bildirib ki, itkin düşənlərin axtarışı fasiləsiz davam etdiriləcək.
Ştat ərazisində 4 İyul – Müstəqillik Günü münasibətilə nəzərdə tutulan bütün bayram tədbirləri ləğv edilib.Rəsmilərin bildirdiyinə görə, Quadalupa çayının səviyyəsi cəmi bir saat ərzində təxminən səkkiz metr qalxıb. Nəticədə yaranan daşqın səbəbindən, avtomobillər və bağ evləri sel sularına qərq olub.
Qeyd edək ki, Azərbaycan Xarici İşlər Nazirliyi ABŞ-ın Texas ştatında daşqınlar nəticəsində ölənlərlə bağlı başsağlığı verib.
Vüsalə İsgəndərova
