Rusiyanın xarici işlər naziri Sergey Lavrov Şimali Koreya lideri Kim Çen In ilə Vonsan şəhərində keçirdiyi görüş zamanı Moskva və Pxenyan arasında mövcud olan “məğlubedilməz döyüş qardaşlığını” xüsusi vurğulayıb.
Rusiya Xarici İşlər Nazirliyinin yaydığı məlumata görə, Lavrov regional rəqiblərə açıq mesaj verərək, ABŞ, Yaponiya və Cənubi Koreyaya düşmənçilik xarakterli koalisiya yaratmamaq barədə xəbərdarlıq edib.
Rusiyanın “TASS” dövlət agentliyinin məlumatına görə, Lavrov bəyan edib: “Biz bu əlaqələrdən istifadə edərək kiməsə, o cümlədən Şimali Koreyaya və əlbəttə ki, Rusiyaya qarşı yönəlmiş ittifaqların qurulmasına qarşı xəbərdarlıq edirik”.
Bu xəbərdarlıq ABŞ, Cənubi Koreya və Yaponiyanın Koreya yarımadası yaxınlığında ABŞ-ın nüvə başlıqlı bombardmançı təyyarələrinin iştirakı ilə birgə hava təlimləri keçirməsi fonunda səslənib.
Son illərdə Rusiya və Şimali Koreya arasında münasibətlər əhəmiyyətli dərəcədə möhkəmlənib. Bu tərəfdaşlıq Rusiya Prezidenti Vladimir Putinin ötən il Şimali Koreyaya səfərindən sonra daha da dərinləşib.
İnkişaf edən tərəfdaşlıq çərçivəsində Şimali Koreya Rusiyanın xüsusi hərbi əməliyyatına dəstək məqsədilə hərbi qüvvə və sursatla təmin edir, Rusiya isə öz növbəsində bu ölkəyə hərbi və iqtisadi yardım göstərir.
Lavrov Vonsandakı görüşü iki ölkə arasında “strateji dialoqun” davamı kimi səciyyələndirib və daha çox birbaşa təmasların olmasını arzuladığını bildirib.
“TASS” agentliyinin Lavrovdan sitat gətirərək verdiyi məlumata görə, nazir deyib: “Biz Ukrayna böhranı ətrafında vəziyyətlə bağlı fikir mübadiləsi apardıq… Koreyalı dostlarımız xüsusi hərbi əməliyyatın bütün məqsədlərinə, eləcə də Rusiya rəhbərliyinin və silahlı qüvvələrinin fəaliyyətinə qəti dəstəklərini təsdiqlədilər”.
Agentlik həmçinin xarici işlər nazirinin müavini Andrey Rudenkonun ilin sonuna qədər daha çox Rusiya nümayəndə heyətinin Şimali Koreyaya səfər etməyi planlaşdırdığını təsdiqlədiyini qeyd edib. Bu, iki ölkə arasında strateji tərəfdaşlığın daha da gücləndiyini göstərir.
Qarşıdakı dövrdə Lavrovun Şanxay Əməkdaşlıq Təşkilatının iclasında iştirak etmək üçün Çinə səfəri nəzərdə tutulur.
