Azərbaycanın Böyük Britaniyadakı səfiri Elin Süleymanov “Financial Times”a açıqlamasında bildirib ki, yeni razılaşma regionda həm nəqliyyat əlaqələri, həm də normallaşma baxımından tarixi dönüş nöqtəsidir. “Daha yaxşı əlaqələr iqtisadi imkanlar yaradacaq,” – deyə o vurğulayıb.
Süleymanov qeyd edib ki, bu addım Azərbaycan və Ermənistanı tarixi sülh sazişinə daha da yaxınlaşdırır və sülh prosesinə sadiqliyi nümayiş etdirir.
Səfir xatırladıb ki, 2023-cü ilin sonunda Azərbaycanın beynəlxalq səviyyədə tanınan ərazilərinə tam nəzarət bərpa olunub və Bakı dəfələrlə Minsk Qrupunun ləğvini tələb edib. Ağ Ev də bu mövqeyi dəstəkləyib.
“Minsk Qrupunun fəaliyyətinin başa çatması münaqişə dövrünün geridə qaldığını göstərir. Biz postsovet dövrünün münaqişə idarəçiliyindən çıxaraq normal həyat mərhələsinə qədəm qoyuruq,” – deyə Süleymanov əlavə edib.
