Birləşmiş Krallıq hökuməti milli səsvermə yaşının 18-dən 16-ya endirilməsi üçün planını açıqlayıb. Bu təklif Britaniya demokratiyasını gücləndirməyə yönəlmiş “əsaslı dəyişikliklər” paketinin tərkib hissəsidir.
Hakim Leyboristlər Partiyası 16 və 17 yaşlı gənclərə səsvermə hüququnun verilməsi ilə yanaşı, seçki qanunlarına bir sıra mühüm islahatlar təklif edir.
Bu islahatlar xarici siyasi müdaxilədən qorunmaq, kampaniya iştirakçılarının sui-istifadəsinə qarşı yeni qaydalar tətbiq etmək və Britaniya siyasi partiyalarına xarici ianələrlə bağlı qaydaları sərtləşdirmək məqsədi daşıyır.
Baş nazirin müavini Ancela Reyner bildirib ki, hökumətin əsas vəzifələrindən biri “institutlarımıza və demokratiyanın özünə olan etimadın azalması” problemini həll etməkdir. O, “əvvəlki nəsillərin etdiyi kimi, biz də demokratiyamızı yeniləməliyik” deyə vurğulayıb.
Baş nazir Keir Starmer bu mövqeyi dəstəkləyərək dəyişikliyin ədalət prinsipinə əsaslandığını bildirib. “Düşünürəm ki, 16 və 17 yaşlıların səsvermə hüququna malik olması çox vacibdir, çünki onlar işləmək və vergi ödəmək üçün yetkin yaşdadırlar,” deyə o qeyd edib.
Starmer əlavə edib: “Əgər siz töhfə verirsinizsə, pulunuzun nəyə xərclənməsini istədiyinizi söyləmək imkanınız olmalıdır. Demokratiyamıza daha çox gənc cəlb edə bildiyimiz üçün çox şadam.”
Ancela Reyner də bu fikri təsdiqləyib: “Gənclər artıq işləyərək, vergi ödəyərək və hərbi xidmətdə olaraq cəmiyyətə töhfə verirlər. Onlara təsir edən məsələlərdə söz sahibi olmaları tamamilə doğrudur.”
Qeyd edək ki, Britaniya Silahlı Qüvvələrinə qoşulmaq üçün minimum yaş həddi 16-dır. Reynerin sözlərinə görə, “Demokratiyamızı təbii qəbul edə bilmərik. Seçkilərimizi sui-istifadədən qorumaqla və iştirakçılığı artırmaqla cəmiyyətimizin təməllərini gələcək üçün gücləndirəcəyik.”
Bu islahat Leyboristlər Partiyasının seçki kampaniyası zamanı verdiyi vədlərdən biridir. Hökumət yeni qanunun 2029-cu ildə keçiriləcək növbəti ümumi seçkilərdən əvvəl qüvvəyə minməsini hədəfləyir.
Artıq Şotlandiya və Uelsdə 16 və 17 yaşlı gənclərin yerli və ölkə səviyyəli parlament seçkilərində səs verməsinə icazə verilir.
Reyner Britaniyanın “The Times” qəzetindəki məqaləsində bu islahatın əsas məqsədini belə ümumiləşdirib: “Bu, ədalət, şəffaflıq və gənclərə ölkəmizin gələcəyində pay vermək məsələsidir. Bu, seçki sistemimizi 21-ci əsrə uyğunlaşdıraraq gücləndirmək deməkdir.”
