1776-cı ildə qəbul olunan Müstəqillik Bəyannaməsi ilə Amerika Birləşmiş Ştatları Böyük Britaniyadan ayrıldığını elan edib. Bu sənəd ABŞ-ın rəsmi müstəqil dövlət kimi yaranmasını və xalqın azadlıq, bərabərlik, xoşbəxtlik hüquqlarını bəyan edir.
Həmin vaxt sənəd ABŞ-ın tərkibində olan 13 ştat tərəfindən qəbul olunub. O vaxtdan etibarən 4 iyul ölkənin ən önəmli bayramlarından biri sayılır. Şəhərlərdə paradlar, konsertlər, ailəvi pikniklər, oyunlar və axşam saatlarında atəşfəşanlıqlar təşkil olunur. Ən məşhur və gözlənilən ənənə axşam saatlarında keçirilən böyük atəşfəşanlıqlardır. Xüsusilə Nyu-York, Vaşinqton və Boston şəhərlərində minlərlə insan bu möhtəşəm şouları izləmək üçün toplaşır.
Hot-doq yemə yarışması da bayramın maraqlı tədbirlərindən biri hesab olunur. Hər il 4 iyulda Nyu-Yorkun Coney Aysland bölgəsində keçirilən bu yarışma 1916-cı ildən gələn ənənədir. Qeyri-adi yarış televiziya ilə canlı yayımlanır və yüz minlərlə insan tərəfindən izlənilir.
Amerikalılar ailəsi və yaxınları ilə birlikdə açıq havada pikniklər təşkil edir, musiqi festivallarında iştirak edir. 4 iyul amerikalılar üçün təkcə tarix deyil, həm də azadlıq və birlik günüdür.
Bəzi ştatlarda, xüsusilə Massaçusets və Pensilvaniyada, 1776-cı ildə oxunan Müstəqillik Bəyannaməsi bu gün də ənənəvi şəkildə səsləndirilir. ABŞ-ın 2 dollarlıq əskinazının arxa tərəfində bu tarixi hadisənin təsviri əks olunub.
Vüsalə İsgəndərova
