Dünyanın 75 şəhəri üzrə aparılan müqayisə göstərir ki, yüksək maaş mənzil almaq imkanının da yüksək olması demək deyil. Əsas amillərdən biri gəlirlə mənzil qiymətləri arasındakı nisbətdir.
Müqayisədə şəhərlərdə vergilər çıxıldıqdan sonra orta aylıq maaş və şəhər mərkəzindən kənarda mənzillərin bir kvadratmetrinin qiyməti nəzərə alınıb. Hesablamada birillik xalis maaşla neçə kvadratmetr mənzil almağın mümkün olduğu göstərilib.
İsveçrənin Sürix şəhəri aylıq 8 160 dollar xalis maaşla siyahıda birinci olsa da, mənzil əlçatanlığına görə cəmi 6 kvadratmetr göstərici ilə 75 şəhər arasında 47-ci yerdə qərarlaşıb. Niderlandın Rotterdam şəhərində bu göstərici 12,4, Almaniyanın Frankfurt şəhərində isə 11,7 kvadratmetrdir.
ABŞ-ın Nyu-York şəhərində birillik xalis maaş 9,4 kvadratmetr mənzil almağa kifayət etdiyi halda, London üçün bu göstərici 7,2, Paris və Lissabon üçün isə 4,3 kvadratmetrdir.
Müqayisənin digər nəticələrinə görə, 75 şəhərin 63-də birillik xalis maaşla 10 kvadratmetrdən az mənzil almaq mümkündür. 16 şəhərdə isə bu göstərici 5 kvadratmetrdən aşağıdır.
Almaniyanın Leypsiq şəhəri ilə Honq Konq arasındakı fərq də diqqət çəkir. Hər iki şəhərdə orta aylıq xalis maaş təxminən 3 200 dollar olsa da, birillik maaş Leypsiqdə 16,3, Honq Konqda isə cəmi 2,2 kvadratmetr mənzilə bərabərdir. Beləliklə, eyni gəlirlə Leypsiqdə təxminən 7,4 dəfə daha çox mənzil sahəsi almaq mümkündür.
