Dünyanın harasında yaşamasından asılı olmayaraq, Azərbaycan vətəndaşı hər zaman öz dövlətinin diqqət və qayğısını hiss edir.
Xarici İşlər Nazirliyimizin həyata keçirdiyi çoxşaxəli fəaliyyət, eləcə də səfirlik və konsulluqlarımızın fasiləsiz işi bir daha göstərir ki, dövlətimiz soydaşlarının yanında olmağı ən mühüm vəzifələrdən biri sayır.
Onlar təkcə diplomatik mərkəzlər deyil, həm də minlərlə həmvətənimiz üçün etibarlı ünvan, dayaq və doğma Azərbaycan evləridir.
Bu missiyanın davamı kimi, Azərbaycanın Los Ancelesdəki Baş Konsulluğu da mütəmadi olaraq ABŞ-ın qərb ştatlarında yaşayan vətəndaşlarımız üçün səyyar konsulluq xidmətləri təşkil edir. Bu xidmətlər sayəsində soydaşlarımız sənəd məsələlərini doğma yurdundan uzaqda çətinlik çəkmədən həll edir, dövlətin dəstəyini ən yaxın ünvanlarda hiss edirlər.
MÜSAHİBƏ – Şəbiyeva Aynurə:
Yaxın zamanlarda fərqinə vardım ki pasportumun istifadə müddəti bitib və mən ən yaxın konsulluq olan Los Angeles`ə getməliyəm. Bu həm vaxt baxımından, həm büdcə baxımından səmərəli olmaığı üçün biraz narahat idim.
Lakin bir neçə gün öncə məlumat aldım ki, Los angelesdəki konsulluğumuz bura təşrif buyuracaq vətəndaşlarımıza xidmət göstərmək üçün. Mən dərhal müraciət etdim, qeydiyyatdan keçdim və sənədlərimi toplayıb gəldim. Konsul operativ şəkildə mənə kömək etdi.
Bu çox gözəl bir təşəbbüsdür. Bu onun üçün gözəl təşəbbüsdür ki, bir çox insan ailəsi ilə getmək məcburiyyətində idi Los-Angelesə. Ancaq bu sayədə büdcədən qənaət etmiş oldular.
Növbəti belə görüş avqustun 23-də Kaliforniyanın Los Gatos şəhərində keçirilib. Azərbaycan Mədəniyyət Cəmiyyətinin ofisində baş tutan tədbirdə pasportların yenilənməsi, etibarnamələrin verilməsi, vətəndaşlıq qeydiyyatı və digər mühüm sənədləşmə işləri vətəndaşlarımızın birbaşa müraciəti əsasında yerinə yetirildi.
Bu təşəbbüs, həm də vaxt və məsafə baxımından vətəndaşlarımıza böyük rahatlıq yaradıb.
MÜSAHİBƏ – ƏLIMƏMMƏDOVA ROZI:
Uzaq yoldan gəliblər bizim üçün çox yaxşıdır ki, onlar bura gəliblər, çünki elə vaxt olub ki məsələn ora getməli olmuşuq uşağıma görə. uzaq yol, vaxt yox işə görə.
Bura gəlməyi bizim üçün çox rahatdır. Evimizədə yaxındır, işimizədə yaxındır. Çox razıyıq. Sürücülük vəsiqəsi və şəxsiyyət vəsiqəsi çox istəyərdim olsun
“Səyyar Konsul” layihəsi isə təkcə sənəd işləri ilə məhdudlaşmır. Belə görüşlər, soydaşlarımız arasında həmrəyliyin güclənməsi, milli kimlik və mədəniyyətimizin birgə yaşadılması üçün də gözəl imkan yaradır.
Hər görüş, vətəndaşlarımız üçün həm doğma Azərbaycan nəfəsini duymaq, həm də bir-birinə daha sıx bağlanmaq fürsətidir.
MÜSAHİBƏ – CAVID ƏLIZADƏ:
Bizim konsulluğun fəaliyyəti ABŞ-nin 13 ştatını əhatə edir. Burada əsas vəzifəmiz Azərbaycan vətəndaşının konsulluq kimi xidmət göstərmək və bizim ölkəmizin maraqlarını təşviq etməkdir. Konsul xidmətləri, pasportların yenilənməsi, etibarnamələrin verilməsi, natorial xidmıət bizdə var.
Biz vətəndaşlarımızın yaşadığı müxtəlif şəhər və ştatlara gedir və yerlərində xidmət göstəririk. Biz əlbəttə çalışırıq ki, müraciət edənlərə keyfiyyətli xidmət göstərək və bizim icma bunu hiss etsin. Vətəndaşlar istəyir ki şəxsiyyət vəsiqəsi ilə bağlı yenilik olsun bizdə belə bir şey yoxdur amma gözləyirik gəlsin.
Azərbaycanın Xarici İşlər Nazirliyi və diplomatik nümayəndəlikləri dünyanın hər guşəsində yaşayan soydaşlarımız üçün etibarlı ünvan olmağa davam edir.
Los Ancelesdəki Baş Konsulluq da gələcəkdə ABŞ-ın müxtəlif ştatlarında yaşayan vətəndaşlarımız üçün analoji tədbirləri davam etdirməyi planlaşdırır.
Məqsəd odur ki, istər Bakıda, istərsə də okeanın o tayında – hər bir azərbaycanlı daim dövlətinin diqqətini və dəstəyini yanında hiss etsin.
