Türkiyədəki atəşkəs danışıqları uğursuzluqla nəticələndikdən dərhal sonra Rusiya Ukraynanın dinc şəhərlərinə qarşı kütləvi hücuma keçib.
Prezident Volodimir Zelenski bəyan edib ki, Moskvanın İstanbulda irəli sürülən sülh təkliflərinə cavabı mülki əhaliyə qarşı genişmiqyaslı hava terroru olub.
Rusiyanın gecə saatlarında Odessaya endirdiyi zərbələr nəticəsində şəhərin ən məşhur simvollarından olan “Privoz” bazarı alovlar içində qalıb. Ukrayna Müdafiə Nazirliyinin yaydığı məlumatda hücumların heç bir hərbi məqsədi olmadığı və birbaşa mülki hədəflərə yönəldiyi bildirilir.
Hücum zamanı doqquzmərtəbəli yaşayış binası ciddi zərər görüb, həmçinin ikimərtəbəli bina, yanacaqdoldurma məntəqəsi və YUNESKO tərəfindən qorunan şəhər mərkəzindəki memarlıq abidəsi də hədəf alınıb.
Ukraynanın Fövqəladə Hallar üzrə Dövlət Xidməti bu gecəni “növbəti cəhənnəm gecəsi” adlandırıb. Xilasetmə qrupları dağıntılar altından 38 nəfəri, o cümlədən mənzillərində tələyə düşən beş nəfəri uğurla təxliyə edib.
Prezident Zelenski həmçinin Xarkova endirilən aviasiya bombası zərbələri nəticəsində onlarla mülki şəxsin yaralandığını qeyd edib. “Bunlar heç bir hərbi məqsədi olmayan, tamamilə mənasız zərbələrdir,” deyə Zelenski vurğulayıb.
O əlavə edib: “Biz görürük ki, Rusiyanın yeganə niyyəti təcavüzü və qətlləri davam etdirməkdir. Məhz buna görə də bizim müdafiədə dəstəyə – güclü hava hücumundan müdafiə sistemlərinə, silah istehsalının genişləndirilməsinə ehtiyacımız var.”
Rusiya NATO ilə silah sazişi üzrə mühüm görüşdən saatlar əvvəl Ukraynanı bombalayır
Rusiyanın cəbhə xəttindən uzaqda yerləşən dinc əhalini davamlı və qəddar şəkildə atəşə tutmasına cavab olaraq Ukrayna da Rusiya ərazisindəki strateji hədəflərə zərbələr endirib.
Ukraynanın Soçiyə pilotsuz təyyarə ilə həyata keçirdiyi əks-həmlə zamanı bir neft anbarı hədəfə alınıb. Qeyd edək ki, Soçi şəhəri həm də Rusiya Prezidenti Vladimir Putinin istirahət üçün istifadə etdiyi iddia olunan bir məkan kimi tanınır. Bu fakt Ukrayna zərbələrinin təsadüfi deyil, strateji əhəmiyyət daşıdığını göstərir.
Bu hücum dalğası Ukraynanın müdafiə naziri Denıs Şmıhalın NATO rəsmiləri ilə müdafiə dəstəyinin artırılmasını müzakirə etdiyi bir vaxtda baş verib.
Zelenskinin sözlərinə görə, İstanbuldakı sülh çağırışlarına Rusiyanın cavabı Odessa, Çerkası, Xarkov, Zaporojye, Donetsk, Sumı və Nikolayev vilayətlərindəki yaşayış binalarına, enerji obyektlərinə və universitet idman zalına 103 “Şahid” PUA-sı və dörd raketlə endirilən kütləvi zərbələr olub.
