Qərbin animasiya texnikası və yapon ənənələrinin vəhdəti. Heç demə dünyada yapon animesi adlanan animasiya janrının milyonlarla fanatı varmış. Əsasən məşhur əsərlər, qədim yapon ənənələri və oyunları üzərində formalaşan animelər bu gün ən populyar kinematoqrafiya janrlarından hesab olunur.
Anime erkən XX əsrdə, Yaponiyalı kinoçəkənlər Fransa, Almaniya, ABŞ və Rusiya animasiya üslublarının üzərində sınaq apararkən yarandı.
İndi isə keçək əsas mətləbə. 5 iyul, Los Angeles şəhəri. Sevimli qəhrəmanların obrazlarını canlandırmaq istəyən yerli sakinlər və turistlər şəhərin düz mərkəzinə üz tuturlar.
Yapon animelərində olduğu kimi şərti və oyuncaq silahlarla gələn ziyarətçilər xüsusi olaraq yoxlanılırdı. ‘’Silahlar’’ təhlükəsizlik xidmətinin xüsusi yoxlanışından keçirdi ki, bu da diqqətimdən yayınmadı.
340 mindən artıq iştirakçının qatıldığı anime sərgidə maraqlı atraksionlar təqdim edildi. Komikslər, geyimlər, açıqcalar və digər məhsulların satışı təşkil olundu.
Sərgi çərçivəsində həmçinin anime mütəxəssislərinin və pərəstişkarların iştirakı ilə panel müzakirələr keçirildi. Yapon mədəniyyətinin dünyaca məşhur simvolu olan animenin tarixini özündə əks etdirən kontentlər isə xüsusi maraq kəsb edirdi.
Bəli, animelər nə qədər fantastik olsalar belə, fanatların təqdimatında bir o qədər realistik və canlı təsir bağışlayırdı.
Beləliklə dünya kinosunun paytaxtı hesab edilən Los Angelesdə Yapon mədəniyyətinin ayrılmaz tərkib hissəsi olan əsl əsl anime paradı yaşanırdı.
Kamran Qasimov Los Angeles Kaliforniya
